1Ti 2 | TpiKJPB | STEP | ¶ Olsem na mi strongim bel bilong yu, long, pastaim long olgeta, ol autim askim, ol prea, ol beten bilong mekim wok namelman, na givim tok tenkyu, yu ken mekim bilong olgeta man,

1 Timothy 2

1 ¶ Olsem na mi strongim bel bilong yu, long, pastaim long olgeta, ol autim askim, ol prea, ol beten bilong mekim wok namelman, na givim tok tenkyu, yu ken mekim bilong olgeta man, 2 Bilong ol king, na bilong olgeta husat i gat namba bilong bosim. Inap long yumi ken gat laip i stap isi na i gat bel isi long olgeta pasin bilong bihainim God na pasin i no gat giaman. 3 Long wanem, dispela em i gutpela na i orait long ai bilong God, Man Bilong Kisim Bek bilong yumi. 4 Husat i gat laik long kisim bek olgeta man, na long ol i ken kamap long save bilong tok tru. 5 Long wanem, i gat wanpela God, na wanpela namelman namel long God na ol man, dispela man Kraist Jisas, 6 Husat i givim em yet wanpela pe bilong baim olgeta, long ol i ken tokaut klia long em long taim stret bilong en. 7 We God i makim mi wanpela man bilong autim tok long en, na wanpela aposel, (mi toktok tru insait long Kraist, na mi no giaman,) wanpela tisa bilong ol man i no Ju long bilip tru na tok tru. 8 Olsem na mi gat laik long ol man i beten long olgeta wan wan hap, taim ol i litimapim ol han i holi, na i no gat belhat tru na pasin bilong holim tupela tingting. 9 ¶ Long wankain pasin olsem tu, long ol meri i mas bilasim ol yet long naispela klos i soim gutpela pasin, wantaim pasin bilong pes i sem na pasin bilong yusim tingting gut, i no wantaim gras i gat kain bilas, o gol, o ol kiau bilong golip, o ol naispela klos i dia tru, 10 Tasol (dispela i gutpela long ol meri i tokaut long ol i gat ol pasin i bihainim God) wantaim ol gutpela wok. 11 Larim ol meri pasim maus taim ol i lainim, wantaim olgeta pasin bilong stap aninit. 12 Tasol mi no inap larim wanpela meri long skulim, o kalapim namba antap long man, tasol em i mas pasim maus. 13 Long wanem, God i wokim Adam pastaim, nau Iv bihain. 14 Na Seten i no trikim Adam, tasol taim Seten i trikim meri, meri i stap insait long pasin bilong kalapim lo. 15 Tasol God bai kisim bek em long taim bilong karim pikinini, sapos ol i stap yet insait long bilip tru na pasin bilong laikim tru na pasin holi wantaim pasin bilong yusim tingting gut.